BBC-ის ერთ-ერთი ყველაზე წარმატებული და მაღალრეიტინგული მინი-სერიალი, რომელიც დაფუძნებულია ბრიტანელი მწერლის - ელიზაბეტ გასკელის ნოველებზე: "კრენფორდი", "ჩემი ლედი ლუდლოუ" და "მისტერ ჰარისონის აღსარებები".
მოქმედება 1840-იანი წლების პირველ ნახევარში, გამოგონილ ქალაქ კრენფორდში ხდება, რომელიც ჩეშარის საგრაფოში, ჩრდილო-დასავლეთ ინგლისში მდებარეობს. ამბავი ძირითადად ქალაქის მკვიდრი საშუალო კლასის მარტოხელა და დაქვრივებული ქალბატონების გარშემო ვითარდება, რომლებიც კმაყოფილნი არიან თავიანთი ტრადიციული ცხოვრების წესით, დიდ ყურადღებას აქცევენ აკურატულობას და ინარჩუნებენ არისტოკრატიულ ჩვევებს. დები ჯენკინსები ერთ-ერთი პატივსაცემი ხალხია კრენფორდში, მათ ბევრი მეზობელი, ნაცნობი და მეგობარი ჰყავთ, რომლებიც ხშირად ლხინსა თუ გასაჭირში ერთად იკრიბებიან და ერთმანეთს ეხმარებიან. მის მეტი ჯენკინსი კეთილი, გაუთხოვარი ქალბატონია, რომელსაც ოდესღაც ერთი მამაკაცი ძლიერ უყვარდა, თუმცა ისინი ვერ დაქორწინდნენ. ხოლო მეტის და - მის დებორა ჯენკინსი ძლიერ ტრადიციული და კონსერვატორული ქალია, რომელსაც ყველაფერი გულთან ახლოს მიაქვს, თუმცა ხანდახან დგება მომენტი, როდესაც წესებს არღვევს, რათა გააკეთოს ის, რაც საჭიროდ მიაჩნია. ქალაქში ერთი ახალგაზრდა ექიმია, რომელიც ბევრი ქალბატონის რომანტიკული სამიზნეა, თუმცა მისი გული მხოლოდ სოფი ჰატონს ეკუთვნის. ჰარი გრეგსონი კი პატარა ბიჭია, რომელიც ღარიბ ოჯახში იზრდება და ხშირად საკვებს იპარავს, მაგრამ სურს რომ წერა-კითხვა ისწავლოს. ქალაქში ხშირადაა როგორც კურიოზული და სასაცილო ამბები, ასევე სევდიანი ისტორიები და მოულოდნელობები, რომლებიც კრენფორდელ ქალბატონებსა და მამაკაცებს მუდამ თან ზდევთ...