წმინდა კვირიკეს ეკლესია სვანეთში ყველაზე ძლიერ სალოცავად, სასწაულთმოქმედად და სნეულთა მკურნალად ითვლება. ამ ეკლესიისადმი გამორჩეული რიდი, მოწიწება და უფლისადმი რწმენა ხალხურ სამართალშიც აისახა. განსაკუთრებულად დიდი ან გაურკვეველი დანაშაულის შემთხვევაში ეჭვმიტანილს სწორედ ლაგურკაში წაიყვანდნენ ხატზე დასაფიცებლად, რაც საქმის დასრულებას და გახსნას ნიშნავდა, რადგანაც არ არსებობდა სასჯელი, რომლის შიშითაც სვანს ლაგურკაზე ტყუილზე დაეფიცა და დანაშაული არ ეღიარებინა. ასევე, სწორედ ლაგურკაში ხდებოდა სისხლით გადაკიდებულთა შერიგება, რომლის შემდეგად მათ შორის მტრობა საბოლოოდ მთავრდებოდა.